Ich habe gelernt,   deinen Entscheid    zu akzeptieren.   Verstehen werde   ich deinen Weg   nie.   Dennoch danke   ich dir.   Für unsere   gemeinsame,   wenn auch zu   kurze Zeit.   Für unsere   Kinder   Natascha   und   Nico.

Vor 11 Jahren hat sich mein Mann, der Vater unserer Kinder, kurz vor seinem 
28. Geburtstag mit dem Sturmgewehr erschossen.

Wir waren damals 1 1/2 Jahre verheiratet. Ich wurde mit 24 Jahren Witwe.

Unsere Kinder waren damals 4 Monate und 1 1/2 Jahre alt.   

     Von einem auf den anderen Tag war nichts mehr so wie es war

Marcel,
                                                                                                    
werom besch du so vo eüs gange? Au noch 11 Johr blogt mech no mängmol die Frog. Ond nor du chöntisch mer die Antwort gäh. Es ged doch emmer en Wäg. Wieso hesch du dech mer ned avertrout. Oder hesch's probiert ond ech ha's ned wohrgno?
Genauso wie mech die Frog nochem Werom bloget, genauso bloged mech au höt no zitwis Scholdgfühl. Wenn ech doch die Warnsignal ärnschter gno hätt. Wie du dech ennerhalb vo e paar Woche veränderet hesch. Ech han bes zo dem Momänt, wo mer vo de Polizei gseit worde esch, dass du dech werkli erschosse hesch, ned dänkt, dass es du machsch. Ond au nächhär han i lang ned chönne glaube, dass du nömme do besch. Han mängmol s'Gfühl gha, jetzt chonsch denn eifach zor Tör ine ond alles esch nor en schlächte Traum gse. Ech erenner mech no als wärs geschter gse, dass ech chorz noch dim Tod gmeint han, dech z'gse. Won i de gnau änegluegt han, esch det i dem Restaurant en Maa gsäse, wo der rüde gleche hed. Ech han flochtartig use müesse.

Weisch, ech ben uf de einte Site au höt no, eifach mängisch trurig. Ond denn beni au fasch glichzitig verrockt uf dech. Du hesch mech met eüsne Chend eifach allei glo, dech dinere Verantwortig entzoge. Denn beni so hässig uf dech ond enttüscht. 

Es hed au Momänt gäh, won ech mech gfrogt han, öb du eüs öberhaupt gliebt hesch? Verdammt, mer duet Mönsche wo mer liebt ned so öppis a. Du hesch en riese Schärbehufe henterloh. En Abschedsbrief, wo du mer d'Schold för dini Handlig gesch. Besch du der bewosst gse, was du mer met dem atuesch? Hankerom säg ech mer denn weder, vielleicht hesch du eüs au welle beschötze. Weil du sälber nömm gwösst hesch, wie's sell witergo. Du dech sälber nömme könnt hesch.

Ond denn ged's äbe au die ander Site. Wo möcht, dass es der guet god. Det wo du sid bald 11 Johr besch. Du wersch mis ganze Läbe lang en Platz i mim Härze ha. Du läbsch i eüsne Chend witer. Mängmol luegi in Hemmel ufe und denn hani s'Gfühl, dass i der ganz nöch ben. Gäll, du chonsch metöber wie's eüs god? Du gsesch wenn mer Freud hend oder au trurig send. Weisch, ech ben ab ond zue in Gedanke bi der. Denn öberleg ech so, was wär wenn. Hättemer's gschaffed, zäme eüsi Chend uf erem Wäg z'begleite? Du hesch eüs die Möglichkeit dass usezgfende eifach gno. Ond das macht mi verrockt. Vorallem hesch du mer de Glaube a d'Familie total is Wanke brocht. Mis Beld vo Vater, Muetter ond Chend. So wie anderi das hend. Weisch wie vell mol ben ech früehner a de Wocheändi met eüsne Chend wos no chliner gse send, ufeme Spellplatz gse oder sosch met de Chend onterwägs ond ha mech wie ne Ussetzigi gfühlt. Ha die andere Fraue benede, wo no Familie gha hend meteme Vater. Ech ha mer denn mini Träne vell müesse zrogbhalte ond han denn wenn d'Natascha ond de Nico gschlofe hend, minere Trurigkeit nochegäh.    

Du hesch mer a dem Morge gseit, dass du mech mis ganze Läbe lang wersch ver-folge. Nei Marcel, dass Rächt geb ech der ned. Ech han glert demet omzgo. Eüsi Chend bruched mech. Ech han gwössni Vorstellige ond Hoffnige gha wo sie i mim Buch ene gwachse send, die Vorstellige und Hoffnige send emmer no done, au wenn du nömme do besch. Si selled onder dim Wäg wo du för dech entschende hesch, ned lide. Ech be mer secher, si wärded ehre Wäg mache. Si send no so chli gse, hend praktisch kei Erennerig a dech. Ond doch ben i devo Öberzoge, dass si onbewosst halt scho vell metöbercho hend. Ech hoffe, dass din Entscheid, i erem Rocksack ned allzu vell Gwecht werd inäh. Du wärsch so stolz uf dini Chend. Hättsch Freud a ene. Chasch du det wo du besch, au Stolz ond Freud empfende? Mängmol verspöri de Wonsch, dass du plötzli for mer stosch ond ech all die Froge vo der Beantwortet öber chömti. Ech han vell offni Froge, wo mer mi Verstand scho seid, dass ech die nie werde beantwortet öbercho. Wenn du chönntisch, wördsch du weder zrogcho? Hesch du werkli welle abdröcke? Besch du der bewosst gse, dass dä Schrett entgöltig esch? Dass du dini Chend ond mech nie meh wersch gse? 

Vielleicht wörd i au z'erscht all mini Wuet ond mis ned Verstoh a der uslo, dech eifach mol aschreie. Es Fönkli Hoffnig, Antworte uf all mini Froge öberzcho, han ech bes a mis Läbensändi. Ergendwenn gsämer eüs weder, denn, wenn mini Zit abglofe esch. Aber do pfusch ech garaniert niemertem is Handwärk.

Du hesch vell i mer ene kapott gmacht, es wärded emmer Narbe zrogblibe. Aber genauso hesch du mer met dim Entscheid de Glaube a mech enorm gstärkt. Ech weiss höt, was ech mag leischte ond dass mech i dene 11 Johr ond au uf mim witere Wäg im Läbe nüt so schnell werd omhaue. 

Die Sitene send för dech. Ned zom dech azchlage oder z'verurteile. Au wenn ech do mängmol mini Wuet ond mis Onverständnis au zom Usdrock brenge. Das erlaub ech mer. Das döf ech. Ech möcht der done din Platz gäh. För dech, för mech ond för eüsi Chend. Denn au no noch 11 Johr han i no, wenn ech a dech dänke, immens vo verschedene Gfühl i mer ene. Denn beni Trurig, vermesse dech, hentersenne mech, sueche noch Erklärige ond be eifach fassigslos weil is ned chan verstoh. Ech be denn au wüetend, hässig ond verrrockt. D'Abständ vo mine Tüfs, won i vorallem a dem merke dass i denn all die Gfühl glichzitzig i mer han, send eifach länger worde. Aber si send done. Au met dem hani glert omzgo ond z'läbe demet. 

Du hesch d'Farbe vom Läbe nömme gse.
Ech gse si.
Du hesch d'Wärmi vo de Sonnestrahle nömme gspört.
Ech gspör si.
Du hesch s'zwitschere vo de Vögel nömme ghört.
Ech ghör si.
Du erläbsch d'Entwecklig vo eüsne Chend nömme.
Ech wetts erläbe.
Du hesch s'Gfühl gha, dass der kei Mönsch chan hälfe.
Ech weiss, es ged Mönsche, wo mer hälfed,
wenn ech mech ene metteile.
Du hesch de Glaube a dech sälber verlore.
Ech han de Glaube a mech sälber trotzallem nie verlore.
Du hesch nömme chönne, nömme welle Läbe.
Ech wett Läbe.

Marcel, ech wönsche der vo Härze, dass es der guet god, det wo du besch.

Jo, ech DÄNKE a dech ond du besch eüse STÄRN am Hemmel.

Ech be mer secher, mer gsänd eüs ergendwenn weder.
Ond denn, jo denn, geb mer bitte die Antworte uf all die Froge wo mech all die Johr bishär ond no all die Johr wo chömed beschäftiged. 

              
Du besch eüse Schotzängel
 ond wersch emmer en Platz
       i eüsne Härze ha.

                   
      In Gedanke a dech

          Dini Frau